|
|
9月17日，一个特别嘅日子——老婆生日。每年，老婆嘅生日都要喺防空警报中渡过，因为过多一日，就系所有中国人都记得嘅9.18，今年都唔例外。
上个月就已经安排好咗呢日嘅活动，因为老婆嘅大日子系唔能够怠慢嘅。先去“天使简约”买番过靓芝士蛋糕，然后去环市路世贸大厦嘅“潮濠”叹下潮洲菜。一切都喺自己掌握之中。点知16号，单位领导突然叫我借台数码相机佢用，冇计，为咗擦鞋，唯有双手奉上了。所以呢次推荐系冇影到相嘅。
“天使简约”嘅芝士蛋糕唔使讲，大家都知道正！不过因为有佢哋嘅贵宾卡，生日可以送68蚊嘅生日蛋糕。经过老婆大人嘅精心挑选，我哋卒之补咗32蚊买咗一个价值100蚊嘅芒果芝士蛋糕，正到痹！
晚餐我哋选咗去“潮濠”食。其实呢间嘢食过好多次，多数都系去应酬，无论食饭又好，饮茶又好，每次俾我嘅感觉都系一个字——“正”！趁住今日老婆生日，一于请佢食番餐靓嘢。
强烈推荐嘅菜式：
1、真味清远鸡（100蚊/只，50蚊/半只）。皮爽肉滑，连骨都有味，比以前嘅清平鸡有过之而无不及。
2、香苏芋蓉鸭（38蚊/例）。用芋蓉包住鸭肉嚟炸，上面再放上松化嘅芋丝。呢味菜真系称得上“香苏”两字。一上台就即刻闻到一阵芋头嘅香味，当你夹佢嚟食嗰时，小心跌咗，因为实在太松化啦！
3、香煎蚝仔烙（38蚊/例）。佢系我喺广州食过最靓嘅蚝仔烙，每只蚝仔都大而饱满，厨师煎嘅手法一流，香脆可口，食完老婆仲想再点。
4、冻蟹（130蚊/只）。份量充足嘅大红蟹，性价比同味道系“金华安”和“金城”无法比嘅。
5、原汁西洋菜。以前应酬食过，好正！可惜今次未到西洋菜嘅时候，冇得食。
做得差嘅菜式：
1、酸菜牛肉丸煲（38蚊/煲）。酸菜好味，可惜牛肉丸有“酥”味，大打节扣。
2、鱼鲛粉（21蚊/碗）。鱼皮馄囤可以，可惜汤底系味精水，差过出面街边粉面档。
全日用咗431元（天使简约32蚊，潮濠399蚊），已经搞到老婆鬼咁开心，抵到烂！
最超值的地方：
广州最好嘅高档潮洲菜馆（据闻系省府饭堂） |
