美食:

之前上網見到呢間嘢嘅評價唔錯~
網友們又話好味.又話有優惠.
岀於好奇心就去咗試下..

我哋嗰日去華僑新村外拍~
不知不覺去咗建設六馬路嗰度嗰間分店!
哇!裏邊超多人.超多....
環境一般.但係嘈雜到好似去咗茶樓飲茶咁~
雖然waiter好多.但係個個都冇乜禮貌.
見到人客都唔理.仲要叫佢幾次先過嚟.眞係令人髮指!!!
最抵死嘅係.我坐低點咗嘢之後~就攞岀部相機係度睇相!
之前唔應人嗰條waiter過嚟同我講'小姐,唔可以影噶'
我問佢'乜妳有見到我影相咩?'佢好激氣咁走咗...
之後.我冇理佢.攞囡囡岀嚟影相.佢又行過嚟話'呢度唔可以影相噶'
我話'我又唔係影妳'.跟住佢又好激氣咁走咗...
之後.啲飯上嚟.我梗係本住poco嘅phone人精神.影食物喇!
點知佢再次行過嚟.一手伸係我鏡頭前邊擋住!
小喇叭吖!!!!!我超激氣.我一手'fing'開佢隻手~
我話'妳傻噶?咁對客人噶?'週圍其他客人望住曬佢.
佢就唯有扮斯文同我講'我同咗妳講.呢度唔可以影相噶'
我話'點解唔可以影先?我去白天鵝食飯都畀我影喔.妳呢度好高級噶咩?'
佢話'門口寫住喇.菜式係唔可以影噶'
我話'妳都識講菜式喇.呢啲係飯咂.點解唔可以影先?'
佢話'總之就係唔可以影喇'
我話'就算唔可以影.妳洗唔洗一隻手係咁伸岀嚟擋我鏡頭先?如果鏡頭high花咗.妳係咪賠先?'
佢無言走咗.我覺得佢超冇禮貌.所以企起身同佢講'妳咪走吖.叫妳老細岀嚟.傢下妳乜態度吖?妳咁對啲客都叫服務態度吖?'
佢超串咁bear咗我一眼之後.好無奈咁叫咗嗰類似部長或者老細岀嚟..
嗰個唔知係部長定老細嘅人.對我笑笑口咁講...
'小姐.唔好意思吖!佢新嚟乜都唔識嘢!不過我哋間餐廳規定係唔可以影啲餸菜噶.'
我話'就算唔可以影.妳可以好聲氣同我講啫.洗唔洗一手擋住我鏡頭吖?係咪鏡頭花咗或者爛咗妳哋賠先?'
佢話'係佢唔啱嘅.對唔住吖~咁喇!我哋送兩盃湯水畀妳賠禮吖!'
我話'算鬼數!反正睇佢嗰樣都唔多妥我噶喇!做waiter咁嘅態度點撈吖~'

之後我哋就食嗰兩碟飯~
哇!可能我心情影響到..
點解碟燒鷄柳飯韌到好似橡筋咁嘅??!
老公碟牛仔骨飯一啲都唔似牛仔骨...
最攞命嘅係嗰盃芒果奶昔.臭臭哋嘅~
我隔離臺嗰個女生都同我講.佢盃奶茶都有啲異味...
oh~my god!食物又唔掂.態度又唔掂.環境又唔掂..
呢間咁嘅嘢點撈落去吖??仲要話好食?暈死喇~~~~
最後我哋臨埋單之前.頭先條老串waiter行咗過嚟~
放低咗兩小盃仔嘅香芋西米露.我仲以為佢眞係送畀我哋添~
原來嚮週圍睇一睇.呵呵~個個入嚟幫襯都有送嘅...
呢間嘢眞係連嗰老細都唔掂.呃人嘅!!!!!!!!!!!!!!

總結!用咗50幾蚊買難受!
呢間咁嘅'廣受好評'嘅越名苑~超級差!
我從來冇咁樣受氣過...
反正以後我覺得唔會幫襯佢!黐綫噶...
環境唔掂!價錢好唔掂!服務非常唔掂!員工嘅质數更加唔掂!
垃圾!!!!!!!!!!!!!!


呢間咁嘅越名苑超難食吖!